PERKENALAN
Assalamualaikum wr. wb
Tomatoa
malebbi nenniya silessureng malebbi engkae riamasei ri fuang Allahu
Ta'ala.
Sukkuru’ marajaki lao ri sese arajanna
Fuang Allahu Ta'ala, nasaba fada naweretta mua umuru malampe, tubu majjappa,
enrengnge teppe simata. natofada engkasi fada maddeppungeng rilalenna iyyae
onrong mabbarakka’e mattampa barakka, manginring pammase, maddararing ininnawa.
Mammuare’ asenriasenna barakka fakkasiwiatta iyyae wennie natalle mallebbang,
massanra massama, de gaga massangadi. Nasalewangeng to mapparentata, nataratte
fabbanuae, nasiruju-rujukeng tau massisompung loloe, nasipakario-rio anana’e,
nattuju laleng kallolo mulampekke’e, natattimpa’ parakkusenna anaddarae.
Salawa’ nenniya fappassalama’e tenri
allufai toi kiringengngi ale malebbina nabitta Muhammad SAW. Nabi
jellokengngekki laleng malempu untuk capai suruga fammasena Fuang Allahu
ta’ala.
Sining umma selleng malebbi engkae ri
amasei ri fuang Allahu Ta'ala
De gaga ada kaminang malebbi rifuada
sangadinna Alhamdulillah. Nasaba naweretta Fuang Allahu Ta'ala kesempatan untuk
manynyameng-nyamengi uleng malebbi’e iyanaritu uleng ramalang. Sininna wettue
malebbi maneng, naiyakiya wettu kaminang malebbi iyanaritu wettu sempajang.
Sininna essoe malebbi maneng, naikiyya engka seddi esso kamingang malebbi
iyanaritu esso juma. Sininna ulengnge malebbi maneng, naiyakiya uleng kaminang
melebbi iyanaritu uleng ramalang. Nasaba rilalenna tassiwennie tampu’I deceng
temmaka battoa. Fada-fadanna ri lalenna iyyae wenni mammulanna ramalang, narekko
engkaki makkasiwiang karena Fuang Allahu Ta'ala riakkattai, majeppunna
mafaccikki fole ri dosaE fada faccinna anana mula rijajiangnge ri indonna.
Tomatoa malebbi nenniya silessureng
malebbi engkae riamasei ri Fuang Allahu Ta'ala
Asukkurukeng temmaggangka idi
makkekkuangnge nasaba naweretta Fuang Allahu Ta'ala umuru’ malampe nenniya
teppe mattugengkeng nassabari engkaki makkekkuangnge engkaki makkasiwiang ri
lalenna uleng ramalang. Maega silessuretta, maelo mupa rattei riasengnge uleng
ramalang, naiyakiya leleni ri fammasena Fuang’e. Maega silessureng selletta
maelo makkasiwiang, maelo hadere’ ri lalenna masiji’e fada laona idi maneng iya
engkae hadere’ makkekkuangnge, naiyyakiya de nariwereng fakkulleng ri Fuang
Allahu Ta'ala.
Tomatoa malebbi nenniya silessureng
malebbi engkae riamasei ri Fuang Allahu Ta'ala
Iyyae wennie wenni mammulanna uleng
ramalang. Narimakkuannanaro, baja ko deccau’I to fada mappuasana.
Narimakkuannanaro, iyya'E wennie, musti engkaki niat untuk mappuasa baja.
Menurut Imam Malik, yero niatna puasa'E ri wenni mammulanna uleng ramalang to
niat si uleng kalepu. “Wakkatta mappuasa siuleng ramalang iyyae taungnge
farellu karena Allah.” Menurut Imam Syafi'i, wajibki niat setiap wenni. Iyae
wennie to nia “nawatu sauma gading an’adaa’I syahru Ramadhan fardhu lillahi
ta’ala”. Yaregga to mabbahasa ogi “wakkatta mappuasa baja ri lalenna uleng
ramalang iyae taungnge farellu karena Allah.” Imam Malik siseng bawang to niyat
siuleng kalepu. Imam Syafi'i tungke-tungke wenni. Meloki pegau’I ye dua, yodding.
Ye wenni tonniya mappuasa si uleng kalepu, nainappa to niya mappuasa untuk
baja. Wenning faimeng to niyassi. Jaji narekko takko takkalufaki metu.... engka
cadangan, furaki manniyat wenni mammulanna ramalang untuk mappuasa siuleng
kalefu.
Sining umma selleng malebbi engkae ri
amasei ri fuang Allahu Ta'ala
Sebelum ulanjutkan bicarakku, nulle
kafang engka makkutana ri fallawangetta maneng makkedae niga anana yero yase’
mabbicara? Magarettamenita.... hehehehehe kongkamena. Jaji taroni uperkenalkan
aleku. Nasaba engka pepata makkeda, tak kenal maka tak saying, tak saying maka
tak cinta, tak cinta maka tak leppo.
Iyye.... iyyamua asekku: Ririn Sunadi.
Naiyya afolengekku iyanaritu fole ri tobulelle. Asenna to duaE pajajijakku:
Indokku iyanaritu Hj. Suntung, nenniya Ambokku riyasengngi H. Kendo. Lulusan Madrasah Aliyah Doping, dan sekarang
makkuliyaka ri Universitas Islam Negeri Makassar Jurusan Fisika. Fisika
maddawwa, agangngare’ melo nafau.
Sining umma selleng malebbi engkae ri
amasei ri fuang Allahu Ta'ala
Engkangekku hadere’ ri kampotta
tanniyatu nasaba amelorekku riyaseng, naiyyakiya nasaba suro anre gurumi.
Nasaba folo fa folo fattanre fa, folo fanni folo foppang narekko suro anre guru
musti riturusi. Engkangekku ri kampotta tanniya nasaba amaccangekku. Nasaba
faddissengeng iya engkae utiwi, yebara’I tana, fadami laona sitekke tana beccu,
naiyakiya idimmitu yodding pancajiwi wanua malappa. yebara’I wae, de nullei
pasaui dekkana seddiE tau. Naiyakia, idimitu yodding pancajiwi tasi maloang.
Yebara’I fejje, de nullei pejjei seddi batu mata bale. Naiyakiya nasaba fada
idi’mi nakkulle mancaji fejje ia mulle pejjei waena tasi’e.
Sining umma selleng malebbi engkae ri
amasei ri fuang Allahu Ta'ala
Engkangekku ri kampotta de usibawa to
duaE pajajiakku. Naiakiya makkukkue, idi’mi tomatoa melebbiku woroane, wala
Ambo. Nenniya idi tomatoa malebbiku makkunaraie, uwala indo. Makkotafaro
idi’mitu sulessurekku makkunrai, yaregga naburane wala kaka nenniya anri.
Sining umma selleng malebbi engkae ri
amasei ri fuang Allahu Ta'ala
Makkuniro kafang riala sebagai ada-ada
perkenalan narekko engka mofa melo berkenalan lebih dalam lagi, silahkan
hubungi alamat di bawah ini.
Mammuare’I addeppu-deppungetta iyyae
wennie namasei Fuang Allah Ta'ala. Nariruntu alebbirenna wenni mammulanna
ramalang. Iyanaitu mafaccikki pole ri dosae fada toha faccinna anana mula ri
jajiangnge ri indo’na. Makkotofaro faimeng, sarekkoammengngi nawerekki Fuang
Allahu Ta'ala kekuatan nenniya teppe mattugengkeng natofada hadere’ wenni
paimeng. Nasaba alebbirenna wenni makaduanna uleng ramalang iyanaritu
yaddampengi dosana nenniya dosa to dua fajajianna.
Akhirul kalam, wabillahi taufik
wassa’ada. Wassalamu alaikum wr wb.
Tidak ada komentar:
Posting Komentar